梁嘉琪宋熙年扮不和　努力搵銀追回疫情損失

藝人宋熙年、林希靈、黃愷怡、梁嘉琪等，今日（24日）在荃灣為HOY TV節目《一線搜查》齊齊切蛋糕慶祝節目邁向200集。

今年新加入節目的梁嘉琪指過往做開輕鬆節目，最初也被監製提醒要認真點，因節目要有新聞感覺。她又稱一直希望與宋熙年一齊主持節目，因由無綫到現在雖然同節目，但還未碰過頭，熙年說：「我哋冇不和㗎。」嘉琪則笑謂要營造不和，增加話題：「我都有同監製要求想同Sarah一齊做節目，佢話盡量安排。」

熙年透露節目邁向200集，節目也有增加資源，增加攝製隊。講到無綫裁減員，她說：「都有聯絡以前啲朋友，但係就冇聽到佢哋受影響，同埋依家復常，呢兩個月市道都好番好多，就算受到影響出邊都會有多啲機會。」嘉琪則指疫情時工作處於半退休狀態，近期開始有晚宴活動主持工作，要努力追回過去3年的損失。