群星撐港騷　林俊傑會晤周星馳互玩粒點

新加坡天王林俊傑（JJ）最近來港開騷，點知就同當紅組合MIRROR錯誤溝通惹嚟「彈鐘風波」，但尋晚（24日）依然獲天后容祖兒現身撐，做個唱嘉賓。撐佢嘅巨星又點止祖兒一個，估唔到連影壇笑匠周星馳都要同佢「會晤」，仲親自提筆贈JJ！見二人今日（25日）同時晒出新相，再次只出背面嘅星爺，就同JJ互笠高帽，佢留言：「聽說JJ玩猜猜畫畫很是了得，果然落筆雄渾有力，充滿着後現代結構主義的激情與吶喊。我惟有將畢生畫功全逼出來，才勉強打個平手。同時猜中我和JJ的，選出一位送獎品。」

只見佢同JJ都各自喺張白紙上面畫上一點黑點，佢就叫人估JJ嘅歌名，JJ就嗌粉絲估星爺嘅經典電影名，各出奇謀吸like，仲要有嘢送，睇嚟今次大戰又會引嚟一眾藝人網上「廝殺」，務求得到星爺嘅新「墨寶」！