馮允謙跳貼身舞　扮錫林明禎

「唱作歌手」馮允謙（Jay）昨日在紅館舉行第二場騷，圈中好友蔡一傑、ANSONBEAN、Jer@MIRROR、「Jay女郎」徐㴓喬（Asha）和劉沛蘅（Hillary）、洪卓立、肥仔@ERROR、Tim@Dear Jane與太太楊洛婷等捧場，他們不但在Jay勁歌熱舞時，起身跟住跳舞，完場後跟Fans一樣不肯離場，還起哄大叫「Encore」，非常熱情。

表演嘉賓林明禎昨晚換上全新紅色貼身裙，大騷身材和美腿，她與Jay貼身舞火辣升級，最後兩頭靠近幾乎咀嘴時關燈，令人充滿幻想，全場尖叫。另一位嘉賓梁釗峰出場，兩人合唱《我好想你》後，釗峰透露與Jay首次約會是一起去欣賞填詞人周耀輝老師的音樂會，剛才合唱的歌正是他的作品，希望大家喜歡他們的合唱版。

釗峰揚言Jay在他我心中很重要，又說：「佢身邊每個人都愛惜、關心和照顧佢，係有原因。幾年前佢生日，我模仿佢錄過嘅一段旋律，唱咗句生日快樂嘅訊息畀佢。正常都係覆一句多謝，最多畀埋心心，但佢唔只畀心心，仲錄番條影片畀我，一齊睇。」台上螢光幕播出Jay將多謝的說話用英文唱出，非常可愛。釗峰問觀眾：「係咪好Sweet？嘩，我好想Check吓當時糖尿指數。其實我都好想知喺佢心目中釗峰係點？有一次拍節目，佢話：『我每次見到釗峰都好開心、好想笑，佢個樣好似Snoopy。』」身旁的Jay搶着說：「真係好似，好可愛，所以我叫佢『Snoopy』！」釗峰無奈地說：「喺佢心目中我係一隻可愛小狗！」全場爆笑。Jay強調：「唔係可愛小狗，係Snoopy，地位係好高架！」其實Jay是Snoopy迷，釗峰送他Snoopy擺設，對他說：「你放喺枱頭，代表我。」Jay攬住釗峰肩膀說：「雖然佢好可愛，但真嘅Snoopy喺我身邊！」他離場前對觀眾說：「大家都要錫釗峰，I love him. 」全場起哄。然後釗峰獨唱新歌《至少還有你取暖》。

演出後，釗峰坦言感到好安慰說：「佢好叻仔，好識控場（控制現場氣氛），手臂好粗，開騷前見面佢話做GYM好辛苦，做極都無線條，但我見到好勁喎！當我聽到觀眾尖叫聲，我覺得好安慰，佢嘅努力得到肯定。佢最擔心自己講說話嘅部分，但我覺得幾可愛，呢個先係真正嘅佢。」他強調對方待人真誠，值得被更多人愛錫。問到他送Jay公仔，想他放在哪兒？他笑說：「放喺屋企，唔好放喺迷你倉囉！」

昨晚他兩度灑淚，當他唱《Days, They've Gone Too Soon》時，表示感激父母支持他追夢，他說：「Daddy媽咪，我今日夢想成真，我企喺呢度⋯⋯（全場掌聲和歡呼聲）聽唔聽到？雖然我唔係做醫生或者好叻，但我真係好鍾意音樂，多謝你哋畀機會追我嘅夢想。」他邊說邊抹眼淚，除了唱歌還吹奏一段口琴。另外唱《Keep on fight on》時表示這歌是他在谷底時，歌詞給他很大安慰，唱到一半就忍不住喊，觀眾拍掌鼓勵。演唱會尾聲，Jay邀請全場觀眾開手機燈，自拍星海大合照，非常壯觀。