處男騷有張學友加持 馮允謙攬林明禎冇同女友備案

2023年03月28日 10:04
東網電視
更多新聞短片
歌手馮允謙(Jay Fung)一連三場在紅館舉行的演唱會《JAYPOP LIVE@COLISEUM 2023》昨晚(27日)圓滿結束,除了Jay的父母、哥哥、弟弟及女友外,不少圈中人亦是座上客,包括李幸倪、許廷鏗、蘇麗珊與男友、黃淑蔓、冼靖峰、陳曉華、周志文、周志康及梁祖堯等。
連續三晚擔任嘉賓表演跳舞的林明禎,表演完後,由Jay拖着從鋼琴走到台上,Jay口窒窒地說:「我好想多謝你,我緊張到講唔到嘢。」明禎表示他可以講普通話,Jay坦言:「但我普通話都唔叻。」隨即轉用廣普說:「多謝你三晚都做我渣邊(嘉賓),我非常喜歡你,你非常漂亮,身體,不是,是心地很好。」引得全場爆笑!明禎多謝對方邀請:「係好特別體驗,好開心,希望下次唔止跳舞,可以一齊唱首歌。」並即場清唱了幾句歌曲《長相廝守》,獲全場鼓掌支持。
除了明禎,「歌神」張學友特別拍片恭喜Jay開個唱,並向一直很喜歡學友的馮爸爸、馮媽媽說:「多謝你哋鍾意我,喺佢面前經常播我嘅歌,令佢鍾意中文歌,呢個好重要,係歌手其中一個功用。恭喜你哋,好成功養育佢成為好體面嘅人,我第一次見佢已經覺得Jay係非常陽光同一睇落去係可付託終身,係好老實嘅年輕人,我想請教你哋點可以教到個仔咁?我都有個女,教成點唔好講,你教我嘅話,我可以做Jay演唱會嘉賓。」
期間Jay感謝家人對他的支持,他稱:「我屋企人畀好多支持我,我最初話入行,父母好大質疑,覺得呢行好難,5年前我好低潮,當時未簽公司又冇收入,爸爸好好,佢今年65歲,佢仍然工作,辛苦做嘢,因為佢擔心我做呢行收入唔穩定,所以爸爸I love you。哥哥第一次睇我做騷,佢放下工作,佢3晚都有來,I Love you。」他續指自己只是一個喜歡唱歌的普通人,但很好彩有公司為他出歌及開個唱,他揚言:「我可以在大家面前唱歌係我嘅榮幸。」但因為音準問題,歌迷卻誤把榮幸聽成遺憾,全場歌迷爆笑,見到粉絲的反應,他才知道自己發音有問題,並謂:「我喺香港咁多年中文都咁差,我會努力學好中文。」
受訪時,Jay表示給自己紅館處男騷70至80分,認為還有進步空間:「覺得跳舞可以跳好啲,韓團舞我由一月開始練,我本身唔識韓文,歌詞係用英文拼音再死記,又唱又跳係有啲吃力,我知道自己跳舞唔好睇,但我好用心去跳,希望粉絲開心。我都鍾意跳舞,但我唔知觀眾鍾唔鍾意睇,但我唔會理其他人點諗。」
提到邀請明禎擔任嘉賓,他稱由公司決定,由於歌曲很浪漫及性感,所以要考慮哪位女星跳舞好看又不嫌棄他,認為明禎十分符合。問到在女友面前與明禎大跳貼身舞,會否擔心女友呷醋:「女友住喺酒店,我冇乜時間見到佢,未有時間坐低傾。(擔唔擔心要跪玻璃?)你哋咁講令我好擔心,我剛做完騷畀我冷靜吓先。(有冇預先同女友備案?)冇,係一個Surprise。女友睇完騷話好精彩,以我為榮,希望佢唔好呷醋,我個心得一個人。」至於學友拍片,Jay坦言事前全不知情,大感驚訝:「我好鍾意學友,爸爸係學友超級超級粉絲,我第一次聽嘅歌就係學友嘅歌,爸爸成日模仿學友唱歌。(學友話下次做你個唱嘉賓?)喺紅館開演唱會係好難,今次難得有期,公司又爭取到,都唔唔幾時有下次,所以我係好珍惜今次機會,我都想好快再開。(暑假再開?)唔知歌迷仲睇唔睇?我好想帶歡樂同開心畀歌迷,呢個係我目標。(下次騷肌?)今次騷咗少少手臂,我會盡量操弗啲。(如果下次開四面台驚唔驚?)第一場一定驚,但我對自己有信心。」