Edan不擔心「退粉」潮:呢啲係佢哋個人選擇

2023年03月29日 23:11
東網電視
更多新聞短片
呂爵安(Edan)為演出電影《死屍死時四十四》進行首映禮,粉絲逼爆商場。Edan對新片有信心,亦不介意戲份不算多:「能夠參與好電影已經係好開心,戲份多與否好睇角色有冇發揮,好鍾意今次嘅體驗同之前好唔同。」剛由日本拍攝《盜月者》回港的他表示第一次到外地拍電影,感覺良好,雖然空閒時間不多,但也有趁機逛逛和去吃東西,亦有相約姜濤、Jeremy吃飯,可惜未能成事。
講到有指通關後韓團「襲港」令MIRROR人氣下滑?他說:「唔係好清楚,大家會多咗選擇,呢個係時候話畀我哋知要更加努力,BLACK PINK、周興哲我都想睇,但好嬲要做嘢睇唔到,都好嘅大家可以睇多啲唔同嘢,人哋好犀利,自己都要做好啲、做叻啲。(有粉絲「退坑」?)呢啲係佢哋個人選擇,如果時間長咗,可能冇咁鍾意都冇問題,情感嘅嘢控制唔到,如果係覺得我哋未夠努力、唔夠叻,要再努力啲,如果見到有粉絲脫粉的確係有啲唔開心,唯有希望遲啲再鍾意番我。(你啲粉絲有冇少咗?)簡中都見到有人話唔追喇,數字幾多就唔知,但佢哋都好善良、仁慈,唔會特登同我哋講退粉。(話因為MIRROR經常唔齊人?)12人一齊係少啲,因為各自有工作,希望嚟緊有團嘅綜藝節目,計劃緊,大家要等等。」
講到他與盧瀚霆在日本開工期間分享合照,卻被罵消費「田牧CP」,Edan亦罕有反擊,他說:「唔係開火,大家理性討論,藝人好難攞個平衡,好易畀人抽秤,藝人都係人,見唔啱嘅嘢都要識得保護自,唔係要鬧、要嬲、引起罵戰,係想帶出一啲事實道理,係咪需要咁多負面攻擊呢。」
同場,毛舜筠表示未試過拍一部戲完全未看過:「我同導演、監製想睇成套戲,但係監製同我講一定要入場同觀眾一齊睇先有氣氛,之後一定會抽時間入戲院睇。」
港產片近期票房好,加上復活節檔期上映,新片最低消費是否數千萬票房?她笑說:「唔好畀導演、監製咁大壓力,佢哋都勞苦功高。我從來報喜不憂,電影上映反應,都有少少喜嘅。」
講到有指通關後,韓星等襲港令MIRROR人氣下滑?她對「仔仔」有信心,覺得所他們一直很努力,沒有擔心他們未來發展:「完全睇唔到呢個這情況,剛才入場,阿仔(Eden)出現,好似地震咁。」
另外,同場ERROR成員何啟華(阿dee)亦有到場,受訪時笑謂並不是棒呂爵安場:「Edan唔入流啦。」他直言是來支持導演何爵天,因為是導演第一部喜劇,並直言會趁機搲撈。講到有指MIRROR近期出現「退粉」潮,他說:「呢啲係每個人嘅自由嚟,鍾意就會繼續鍾意,唔鍾意就會唔鍾意囉。(ERROR驚唔驚?)我梗係唔驚,本來都冇乜人鍾意,依家多咗人鍾意,已經贏咗昨日嘅自己。」
他透露最近忙於為電影工作做準備,坦承因《毒舌大狀》大收帶挈工作增加。講到馬來西亞票房成績不錯,除了謝票外可會當地登台?他笑說:「咁就要預埋ERROR,有乜事可以賴佢哋3個嘛。」