湯洛雯疑春天舉行婚禮 蔣家旻口窒窒話…

2023年03月31日 16:26
東網電視
更多新聞短片
藝人吳偉豪、蔣家旻及陳曉華(Hera)現身無綫劇集《非常檢控觀》試造型,對於成為高層樂易玲點名力捧名單對象,吳偉豪說:「一直都覺得被力捧緊,因為公司安排嘅工作非常多,真係好好彩,又有好多劇、亦可以拍到《愛‧回家之開心速遞》。(會唔會似同周嘉洛咁一樣離組?)應該會暫別,好似之前拍《回歸》時都有暫別,公司都想我暫時專注新劇。」問到爸爸吳大強最終會否客串?他稱未知能否安排到。
Hera對於被力捧亦感榮幸:「有好多機會演出,所以好珍惜每次機會,因為試過一年冇嘢做,所以一直都將每個機會視為最後一次,盡力去做。(有壓力?)未有呢個講法時,我都一直畀壓力自己,以前會比較怕講嘢,依家會嘗試畀啲意見,希望會令成件事好啲!」
至於家旻則表示公司一直給予機會:「幾年前我仲係演緊妹妹時安排我轉形象,演成熟少少角色,成績都好。(拎埋女配值得捧?)唔好咁講,聽到好大壓力,每次都係由零開始,今次會同之前有啲唔同,半忠半奸。(上次畀李成昌強暴,今次演父女?)今次我唔會畀機會昌哥施暴,會大義滅親!」
談到好姊妹湯洛雯於社交網出Po,暗示將於春天舉行婚禮,家旻對此說:「前排大家有食飯,但未收到消息。(仲咩答到口窒窒?)依家唔係演緊戲,所以先會口窒!未知佢婚期係幾時,到時都要同公司度期。(做姊妹團?)未必,之前朱千雪同岑杏賢結婚,我哋都係賓客享受婚禮,所以今次都想咁樣,同埋都想搶到花球。」