一年一度準時「開唱」！魔音Angelababy出「新歌」吸客

內地女星Angelababy（楊穎）自與影帝前夫黃曉明離婚後，一度被指資源下滑再無靠山，不過如今佢痛定思痛再次振作，繼攬實節目《奔跑吧》固定主持之位，同趕拍內地古裝劇《相思令》後，乘勝追擊，今日（1日）就趁愚人節宣布推出全新國風單曲《表白君小姐》，更專登換上古裝影封面，令人賞心悅目。

其實Baby多年來被笑「魔音」，而佢都唔怕自嘲，每年4月1日愚人節，都會同粉絲開玩笑，講笑指自己開演唱會或出歌，粉絲亦好識做，次次都準時「收聽」，所以今年都唔例外，雖然只係惡作劇，不過工作室亦認真配合，上載一系列古裝扮相照，又留言：「楊穎愚人節音頻，任何人沒有聽過這首限定單曲小室都會傷心的。」