余德丞遊日餐廳拍片又出事 4人行嗌兩碗飯被插失禮
2023年04月11日 20:02
東網電視
更多新聞短片
![](/hk/bkn/cnt/entertainment/20230411/photo/bkn-20230411200255038-0411_00862_001_01p.jpg?20230412180803)
前無綫藝人余德丞回復自由身後百足咁多爪,開咪做DJ兼亮相ViuTV做主持,仲積極經營網上頻道,雖然去年與網紅好友拍片批評一間香港餐廳難食,遭店主入稟索償,幸最後法官下令撤案。不過轉頭佢又再出事,近日佢再與同一網紅好友合作,一行4人去到日本秋葉原一間餐廳用膳,期間店主問佢哋係咪用膳抑或只係拍片,余德丞直指感愕然,仲嚇親表示:「燥底喎佢好似。」
及後佢哋想點菜時老闆行開咗,背景傳來有人疑似扔碗嘅聲音,其中一位男主持就解釋日本老闆通常唔容許食客於店內拍攝:「嚟日本拍嘢我已經預咗㗎啦,因為我以前嚟日本呢,我喺日本店影一張相都畀人X。」又指因身在遊客區才較為允許。4人總共嗌咗兩個魚生丼,進食時只細聲講嘢,又指店主不但冇再招呼佢哋,期間唔小心影到店主,對方仲面露不滿,佢哋憶述:「即刻睥住你。」並將鏡頭對準店主放大。余德丞續指認為店主「好慘」,午飯時間都只得佢哋一枱客,又發現店主忽然熄冷氣,以為店主想趕佢哋走,但其實係已賣完食物先提早關店。
影片一出即惹來網民圍插,直指佢哋唔尊重日本文化:「入嚟掛住講嘢唔食嘢, 四個人嗌兩碗飯,人哋不滿好正常」、「有畀錢唔代表要比人X,前提你冇失禮在先。偷影人又點解釋?」、「店主係大反應,但睇番始作俑者,同佢哋之後嘅行為,都好失禮香港旅客」,事後該網紅頻道則澄清係得店主許可先入內拍攝。