馮小剛分唔清迪麗熱巴同娜扎　網民圍攻寸係老年人

內地名導馮小剛最近主演新片《忠犬八公》，為配合宣傳就周圍接受訪問，點知言多必失，近日佢受訪時表示，無法將內地當家花旦迪麗熱巴同娜扎分清楚，即瞬速登上熱搜惹爭議，更引發兩位女星嘅粉絲罵戰！

馮小剛近日接受訪問時，談起年輕演員話題，佢表示雖然演藝圈有眾多年輕演員，但佢都「叫不上名字來」，概嘆說即使聽過名，卻無法將個名同對方個樣Match埋一齊：「誰是迪麗熱巴？誰是古力娜扎？我其實對不上去。」不過佢就透露知曉剛同前東家完約、女星范冰冰細佬范丞丞，原因係佢個女係男方瘋狂粉絲，只要套戲入面有范丞丞，她就會直接Fast forward去到有范丞丞嗰段，對阿女嘅行徑感到訝異。

訪問被公開後，大批迪麗熱巴同古力娜扎嘅粉絲就紛紛衝出嚟護主，指自家偶像個樣獨特，又list晒偶像同對方有咩分別，繼而引發罵戰。亦有網民寸爆馮小剛「老年人分不清人可以理解」，仲笑佢千祈唔係分唔清「八公」同其他狗仔嘅區別，如果唔係戲都冇得拍。