Gin Lee自爆單戀故事　貪人靚仔有才華

歌手Gin Lee（李幸倪）今日（12日）推出第二首派台作品《單戀這件小事》，新歌有別於她以往曲風，是首甜甜的R&B情歌，她說：「因為好多fans都好想聽我唱多啲R&B嘅歌，同埋以往唱嘅絕大部分都係慘情歌，所以今次特別揀呢個style。」R&B當中，她刻意挑選於自己求學時間、影響她很多的歌手的歌曲類型，她說：「其實呢首歌好Babyface，嗰個年代仲有Destiny's Child、Toni Braxton等等，讀書時好鍾意聽佢哋嘅歌。其實個時間點就同我哋依家講緊呢個單戀嘅故事，亦都係求學時期發生好多美好嘅事情，依家睇番嗰個年代聽呢啲歌嗰個回憶係好美好。」

說到「單戀」，Gin亦分享了自己的單戀小故事，讀書時期喜歡上一個靚仔又有才華的學長，自以為毫不浪漫的她因為學長而親手製作小禮物，每每見到對方喜歡的東西，都會買下並不署名地偷偷寄給他，期望有日對方會猜到自己是送禮人，她說：「通常鍾意人嘅時候，我嗰個狀態會囉囉攣、每一日都甜絲絲，好似所有嘢都會變得好美好。每一日都會好想同佢message、講電話，我真係好識講電話，可以講十幾個鐘，哈哈，煲電話粥係我嘅強項！」

Gin坦言錄音時有多方面事情要兼顧，包括語氣及表情，唱得稍為激昂，便會導致反效果，她說：「要笑住唱，有啲段落比較夢幻，演繹上就要營造嗰個氣氛，要keep住甜，就算去到高音、要唱得激昂，都要keep住甜個感覺係比較困難，因為一用力去唱就好容易變得惡，所以要由頭到尾都keep住夢幻、甜同愛，呢個演繹係今次嘅目標。今次真係好想大家聽完之後，會甜絲絲、好開心、好有愛。」

她繼前晚開IG live人肉速遞外賣畀fans後，昨晚又玩直播跟網民互動，因為收到很多訊息問她為何只得兩個名額受惠，着大家想想有甚麼活動可以多人一齊參興， 有網民提議組團睇戲後，大家都紛紛舉手支持，Gin一口答應，隨即聯絡戲院部同事，即時豪氣請fans到英皇戲院觀賞電影《死屍死時四十四》，一切準備就緒，Gin對網民說：「你哋唔好跣我，去到得我自己一條友喺度睇，唔好放我飛機呀，哈哈。」到達戲院取得戲飛後，Gin便不停派飛及合照，笑言自己：「呢排好多嘢撈，又要派飛又要送外賣。」完場後電影《死屍死時四十四》導演何爵天突然現身戲院，原來朋友告知他Gin突發請睇戲，所以他便特意趕過來戲院向她及觀眾致謝。即興深夜睇戲由召集到開場的個多小時，已引來百多位粉絲入場睇戲，Gin號召力認真驚人。