宣萱張慧儀合作拍劇　對ERROR讚口不絕

女星宣萱、姜皓文與張慧儀相識多年，最近於ViuTV原創劇《極度俏郎君》首度正式合作拍劇，眾人均表示期待於劇中互相「鬥戲」。提到「宇宙天團」ERROR，三人均對四子讚口不絕，宣萱更大爆：「ERROR係我接拍嘅其中一個原因，因為睇佢哋節目覺得好有活力、好開心，帶都好多歡樂俾大家。希望可以俾到啲新嘅嘢出嚟，同佢哋合作都有少少驚自己招架不住，因為佢哋轉數快，我忍笑能力又低。」姜皓文就指面對ERROR「獲益良多」，令他從中學識年輕人的諗法：「同佢哋合作開心都嚟唔切，我唔使教佢哋，淨係睇住佢哋就學到嘢！」

而ERROR四子首度合體拍劇，眾人均表示感覺新鮮：「其實我哋從來冇一齊拍劇，之前雖然試過同劇，但其實冇同場遇到過，淨係一齊做過次電影茄喱啡咋，所以今次都好新鮮！」被問到聚在一起有否被其他演員投訴聲浪大?阿Dee笑指與隊友決定做回自己，他說：「我發現只要專心做番自己，Keep住咁嘈，其他人就唔會理我哋，所以為免影響其他人，我哋會繼續嘈落去。」