隱形戰隊︱同陳展鵬有晒默契　歐瑞偉「死」得有型

近期收視一直高企的無綫劇集《隱形戰隊》將於今晚（14日）大結局，昨晚（13日）一集已有兩大角色死亡，分別是歐瑞偉飾演的「張Sir」，及無辜捲入漩渦程可為飾演的「嬌姐」，令觀眾表現更肉緊。由於歐瑞偉與陳展鵬決戰連場後，最後為保護證據死於對方刀下，獲網民大讚犠牲得好型。

年屆61的歐瑞偉為了相關場口，不但跑勻幾條街，更要喪跑樓梯，體力及耐力相當驚人，不過他受訪時卻謙稱一切效果有賴武術指導幫忙度招，以及監製Jazz控制整個節奏及流程，而他要負責的就是做好心理準備：「其實都同展鵬拍開，大家好有默契，因為之前拍好多氣氛Shot，所以埋牙真打只係四個鐘左右。拍親Jazz戲大家都有心理準備，知道要埋位肉搏，冇得揸流攤，全部好認真去做。」談到保持好身手之道，他笑說：「都係得閒做吓掌上壓收吓腹，同埋跑步，因為當時仲有拍緊《愛．回家》，所以都做唔到太多運動，我依家都肥番少少。」