愛瑪羅拔絲鍾意《非常亂婿娶佳人》大團圓結局

90年代茱莉亞羅拔絲（Julia Roberts）與李察基爾（Richard Gere）曾合作大熱愛情喜劇《風月俏佳人》（Pretty Woman）與《走佬俏佳人》（Runaway Bride），來到2023年，輪到茱莉亞的姪女愛瑪羅拔絲（Emma Roberts）與李察基爾合作愛情喜劇《非常亂婿娶佳人》（Maybe I Do），飾演一對父女。女兒與未來女婿邀請各自家長一起見面傾人生大事，怎料雙方父母原來已經背住另一半交叉偷情，關係極為尷尬！

愛瑪被問到電影如何探討愛情時，表示：「我鍾意套戲係好忠實咁呈現唔同角度，你睇套戲時會覺得，啊，呢個好係我，或者呢個好係我伴侶。或者，天呀，真係好似我父母。我成日都好鍾意咁樣，我認為呢個係去戲院好玩嘅地方，你可以帶阿妹、帶阿媽、帶男友或者帶女友，你哋會笑，或者會有少少嘢拗。但套戲係有一個好現實同逼真同真摰嘅地方，亦有一啲皆大歡喜令人鼓舞嘅地方。佢係開心結局。我鍾意咁樣因為有時候我哋係追求緊一個好結局。」