金像獎︱Edan粉絲出動遊艇撐場　500人現身壯聲勢

香港影壇年度盛事《第41屆香港電影金像獎頒獎典禮》今晚假尖沙咀文化中心舉行，依家現場正進行藝人行紅地氈環節，當中於「最佳新演員」獎項中憑兩片角逐提名嘅男團MIRROR成員呂爵安（Edan），就獲近500位粉絲到現場壯大聲勢，而紅地氈位置靠近維港，海上更出現一艘遊艇，上面就有多位粉絲高舉「呂爵安」紙牌及海嘅粉絲，當遊艇駛近，岸上粉絲就即時叫囂，場面熱鬧！

呂爵安受訪指昨晚沒有失眠，因無諗過攞獎：「有兩個入圍已經好感恩。（粉絲包遊艇應援喎！）我到現場見到有架遊艇飄過，可能佢哋知呢個係一個好特別嘅日子，對我亦好重要，所以有咁嘅安排嚟支持，好多謝佢哋。」呂爵安指沒有想過如得獎上台說甚麼，應會多謝兄弟，同埋邊個攞獎就請食飯，不過，他又笑阿Jer：「不過，都係聽住先，Jer都拖開嘅。」談到金像獎特刊錯版，將他的英文名寫在入圍最佳男主角的劉青雲旁，呂爵安則笑言：「我都想Keep番，可能成世人都無可能喺個版（最佳男主角頁面）度出現嘛。」