節目豪晒幾十個奢侈包包　王思佳疑似用A貨斷正

台灣女星王思佳出名係「索爆富婆」，平時都周身富貴，估唔到最近佢現身節目並晒出幾十個奢侈包包時，竟然換嚟孭山寨手袋嘅質疑！日前佢參與拍攝台灣綜藝節目《女人我最大》，仲同名媛關穎齊齊做嘉賓，大家公開大晒珍藏多年嘅限量版、甚至係絕版嘅超貴手袋，仲話希望大家唔好誤會佢哋炫富添。

點知節目出街後，有網友就話佢手上嘅包包怪怪哋，從皮革上睇唔出係牌子嘅經典皮革「Epsom」（皮革種類），且無論係白定粉色都睇唔到紋路，加上佢手袋兩邊皮帶過長，頂部位置摺角位由平變弧形，有個手袋加邊位粗糙，而佢擁有嘅櫻花粉紅款更從未推出過「TC皮」（Taurillon Clemence），明顯係同大家對該袋款嘅認知唔同，因此好奇王思佳拎嘅可能係假貨。佢本人就繼續潛水，僅表示嚟緊會拍片同大家解釋。