思家大戰︱黎耀祥爆李思捷掛住瘟女　封自己過氣視帝

由李思捷主持及監製的《思家大戰》第三季於本周日（14日）首播，黎耀祥率領的「演祥戲拍檔」隊，成員包括《輕．功》拍檔龔慈恩、朱晨麗、鄭子誠及鄭俊弘，另一隊則是由家庭觀眾John Lo率領的「威士忌大使」隊。而李思捷和黎耀祥上演開口水戰，李思捷問黎耀祥：「你哋係咪識輕功同練氣功？」黎耀祥即窒他：「我哋拍過一套劇集叫《輕．功》，你係咪冇睇呀？」李思捷則回答集集都有睇，但黎耀祥不相信並當場寸爆對方每晚「掛住瘟女！」知衰的李思捷即向黎耀祥笠高帽說：「你個視帝祥都幾犀利，唔係識輕功，就係做殺手，再唔係就係拳王，咩都畀你擸晒喇喎！」黎耀祥搞笑說：「我淨係兩個字先做㗎。」全場即起哄大嗌視帝，黎耀祥說：「我依家係四個字，過氣視帝！」

在問答環節中，其中一條問題是講出一句羅文名曲《激光中》的歌詞，出名模仿羅文十分神似的黎耀祥，以羅文腔唱出「光加熱就等於火」，即引起全場拍手。至於朱晨麗的表現不佳，全晚沒有答中問題，李思捷問她覺得自己表現如何，她笑說：「出色吖，由第一題就開始中晒。」