陳淑蘭媽咪離世後首個母親節倍感觸　自揭棄嬰身世

前港姐陳淑蘭（蘭子）向來同媽咪感情甚好，不時喺社交網晒同媽咪吃喝玩樂嘅靚相，直到去年6月喺社交網透露患有腦退化症嘅媽咪最終享年95歲，更泣道：「我最愛的媽咪，暫別的，下世再續母女緣。」如今媽咪離世已有1年，陳淑蘭亦趁着母親節前夕透露，原來係媽咪離世前幾個月，自己先知道原來同媽咪冇血緣關係！

陳淑蘭表示係媽咪生病期間，曾問旁人誕下陳淑蘭嘅女士動向，又擔心女兒陳淑蘭會唔再理佢。對此，陳淑蘭本以為媽咪係受腦退化影響產生幻覺，但之後去檢驗DNA先知原來唔係親生母女，而係媽咪當時將3個月大，仍係棄嬰嘅自己抱番屋企照顧。

另外，陳淑蘭亦相當心痛媽咪差啲將秘密守到入棺材，覺得守咗咁多年秘密嘅同時一定承受咗旁人難以想像嘅壓力。並表示即使知道同媽咪冇血緣關係，但仍感激媽咪對佢嘅栽培、保護和愛，更憶述番媽咪臨終前自己握着媽咪隻手，講出對媽咪嘅感激之情與愛意，許下來世再做母女嘅諾言，母女情深令人感嘆。