方媛開箱貴氣逼人　丹麥皇家御用瓷器最搶Fo

購物係女人嘅天性，天王郭富城老婆方媛（Moka）當然都唔例外，佢日前喺社交平台上載咗條開箱片，畀大家睇吓佢最近買咗啲咩嘢啦！佢先大晒1套丹麥皇家御用手繪瓷器，當中包括茶壺、茶杯，仲有隻價值540美元（約4,212港元）嘅橢圓形盤，十分精緻，搶盡網民眼球！之後佢再晒貴價絲質睡衣品牌嘅頸枕，相信價值不菲，除此之外，佢買咗唔少名牌首飾同手袋，真係相當富貴呀！而網民除咗留意佢買咗咩嘢之外，仲大讚以淡妝上陣嘅佢非常省鏡，紛紛向佢請教保養心得，佢就教網民話：「平時做好保濕，抗初老的用起來。」認真獲益良多呀！