20歲初戀︱陳星妤口快快自爆7年前已「失豬」

藝人陳星妤、余思霆、黎諾懿及林盛斌等，今日（24日）現身電視城參與節目《咁你都唔識》錄影，眾人應要求帶來一位閨蜜擔任「軍師」，場面熱鬧。

談到劇集《一舞傾城》昨晚一集交代她月事來潮，未能成功「賣豬」，但畫面被網民批評「太血腥」，陳星妤笑說：「工作人員覺得鮮色啲先似血，嘥咗好多時間準備同拍，因為啲假血好難清理，結果要1 take完成！」對於「失豬」連日來成熱話，星妤竟口快快答說：「下個星期先冇咗！（指劇情交代為關楚耀獻初夜），畀佢留耐啲啦，劇情好似帶番我去7、8年前咁，我20歲先初戀嘛。（即係你已『失豬』？）哎吔，唔知呀！」

而余思霆打趣因目前未有男友，所以向閨蜜「借男友」出來玩遊戲。自言暫未有追求者的她，當被問到是否已準備隨時再墮愛河，她答：「個個都以為我多人追，所以先冇人追，拍拖嘅嘢可遇不可求。（有乜擇偶條件？）一啲都唔係好高，感覺最重要，唔使靚仔，台灣仲有句說話，講靚仔老公特別難照顧。（唔揀靚仔？）又唔一定，最緊要佢好愛我。」