星語︱竇驍婚後繼續搏殺　孖老婆超蓮登大銀幕

今日係5月25日，睇是日星座運程之前，不如挑戰吓IQ題，阿美生得超級醜樣，但係竟然有兩個靚仔為咗娶佢而大打出手，點解呢？想知答案就要睇《星語》喇！入正題先，今日嘅幸運星係白羊座，你哋嘅運氣好到不得了，可以喺職場競爭入面佔先機。男神彭于晏就係白羊座，不過講真佢邊使競爭，喺各位「彭太」心目中佢一早贏晒！雖然佢早排曾經驚現中年危機被指髮線後移，但後來現身活動嗰陣就出現「髮再生」嘅奇景，頭髮濃密又旺盛，一樣咁靚仔！咁多位「彭太」可以放心啦！

射手座嘅朋友事業運唔錯，不過財運平平，投資要保持審慎。射手座嘅內地男星竇驍上個月同賭王千金何超蓮舉行世紀婚禮之外，當日內地電影《敦煌英雄》官方社交網送上祝福嘅同時，仲宣布呢套係佢哋兩公婆首度合作演出嘅電影！睇嚟嚟緊仲有唔少夫妻檔拍住上喎，事業運果然強勁！