《造星V》陳蕾頻出茅招搶人惹公憤　陳子豐嬲到出Po

Viu TV選秀節目《全民造星V》開播至今，關於參賽者之間嘅話題都唔多，不過老師間嘅矛盾就愈演愈激烈。藝人陳子豐昨晚（25日）就突然喺社交網揞名鬧陳蕾出茅招搶人：「呢幾年，我一直都有聽你的歌，會因為你得獎而在心中暗暗高興。但......公平公正喺比賽中真係好重要，騷擾別人從而得到你想搶嘅人，玩一兩次可以，但次次有你想要嘅人就咁做，就會變得好難睇。」

昨晚終於輪到萬眾期待嘅Win Win男友99號KC閃亮登場，一見到黑馬出場嘅陳蕾就同馮允謙明示：「你都好多正嘢啦！」不過就被對方指控：「你偷咗Nathan（2號魏念恩）」等到KC正式開始表演後，肉緊嘅陳蕾竟然企出嚟遮住韋羅莎，搞到馮允謙大嗌：「奸茅！」而陳子豐喺社交網嘅Post亦引嚟唔少後續熱話，有網友表示認同外，更有網友認為係節目效果，4位導師一定有事前夾過。