高鈞賢親揭每月開支　自認使費大要努力工作

藝人高鈞賢2014年轉戰內地發展，近年開始返港拍劇，仲不時喺社交網拍片分享生活近況。日前佢就以「香港人來內地後一個月要花多少錢」為題，公開每月生活開支，更自爆係「骨精」，每月花近3000人民幣（3,333.80港元）喺按摩上。佢話：「如果工作忙嘅時候，我一個禮拜都試過四、五次，有時我拍戲攰，中間有少少時間休息呢，就會去按吓腳呀，按摩吓，放鬆吓啲肌肉。」之後就係油費，由於中港兩邊走，佢每月油費開支要4000人民幣（4,444.43港元）。

佢又指每月花5000人民幣（5,555.71港元）買生活用品，而飲食嘅開支佔最多，約8000人民幣（8,888.97港元），最後就係「雜費」，連同健身、保險、汽車保養、家用等支出，每月佢花約10000人民幣（11,107.90港元），所以每月總支出約30000人民幣（33,334.95 港元）。高鈞賢又話：「生活嘛，該吃吃、該喝喝，我們要努力工作，花好每一筆錢。」