黃妍英國再度開騷勁興奮:有一種探朋友嘅感覺!

2023年05月26日 21:01
東網電視
更多新聞短片
歌手黃妍(Cath)去年底到英國旅行時,機緣巧合下獲邀在當地開騷,當時更是一票難求,倫敦一場入場人數更是滿瀉。由於上次叫好叫座,未夠一年,Cath再獲邀到倫敦及曼徹斯特開騷,對此Cath心情興奮:「當地好多香港人都好熱切地想聽廣東歌嘅Live,所以見到大家咁熱情係好感動,今次再返去,自己都好期待!」雖然今次場地變得更大,但Cath未感壓力,她認為最重要是心意:「上次畀我嘅感覺好親切,今次再去其實有一種探朋友嘅感覺。」
今次Cath會將早前在香港舉行的音樂會演出帶到當地,她透露屆時會為英國樂迷帶來驚喜:「我嚟緊7月會出新碟,到時會率先唱少少新歌畀大家聽!」難得去到英國,她計劃完騷後都會四處逛逛,旅遊一番,她表示:「近期嘅Trip都係工作加玩樂,所以開完Show都會去玩,上次唔夠時間未有去Borough Market,食嘢之外,仲會飲好多咖啡,希望唔好變肥啦!」