江若琳生B在即　公布BB性別

藝人江若琳（Elanne）去年底在社交網宣佈跟老公蕭唯展（Oscar）造人成功，下月便是預產期，之前一直對胎兒性別保密的Elanne趁卸貨前夕舉行Baby Shower及公佈BB的性別，她在社交網揭盅結果，她寫道：「It's a Boy！好多朋友仔都估中咗。好叻呀你哋！好明顯我都係一個陀仔樣，希望生完會消腫。」她笑言要恭喜老公，因為近幾年對方無限幻想將來有個兒子跟他去看英超，又話將來要培育兒子踢足球，今次真係夢想成真。

她搞笑謂：「生煎小王子到，以後多個人陪你包生煎包啦！而我又多個男人錫我啦，全屋被仔包圍住好有安全感！因為我兩隻貓都係仔。」她又多謝一班好有儀式感的姊妹團送上這個驚喜派對給她。她上載了跟老公情深對望的照片以及兩人的嘴咀視頻，閃到暈！