鍾柔美陪狗仔天台曬太陽　黃嘉雯學擺風水陣

「聲夢小花」鍾柔美（Yumi）與黃嘉雯（Carmaney）以主持身份出席《超級毛特兒大賽》宣傳，二人均帶同愛犬現身，惟天氣非常炎熱，兩女即拿自備風扇仔為狗狗散熱。家中有7隻狗仔的Yumi，透露平日狗狗愛在天台曬太陽：「佢哋鍾意，不過驚中暑，所以都係玩一陣，之後就落去瞓晏覺，有時我都會陪佢哋玩，仲會一齊瞓。」將於下月初考試的她，表示現時邊溫書邊工作，非常充實。

談到首次擔任節目主持，Yumi直言非常緊張，自認向來不善於說話，擔心驚錯嘢，問到現時可感到口才有進步？她笑說：「今次學識咗執生，係一個好好嘅經驗，不過都可以有更大嘅進步空間。」

而Carmaney則透露即將再主持風水節目，表示現時學懂如何擺風水陣：「都有喺屋企擺啲植物。（旺桃花？）又冇，主要係旺財，搵錢重要啲，我都想要桃花，因為可以代表人緣。（唔想拍拖？）都冇拍拖2年，所以隨緣啦，不過都未有追隨者。」