「日本通」周奕瑋轉玩馬來西亞　最難忘歎新鮮榴槤

「日本通」周奕瑋（Jarvis）通關後即驛馬星動，剛完成節目《周遊關西》拍攝工作的他，即應合作旅行社之邀，飛往馬來西亞拍傳宣傳片，幾天行程吃盡當地美食，大飽口福令人羨慕不已。他笑說：「今次去咗檳城及怡保等地，試過1餐食足4碗麵，包括檳城蝦麵及白咖喱麵，之後仲要食多幾個甜品，真係食到肚漲！最難忘係去榴槤山，食樹上熟嘅榴槤，我本身唔係超級榴槤控，但今次食啲新鮮跌落嚟，再即刻開嘅榴槤，發覺真係好好味，我都冇諗過自己可以一次過食咗3個。」

Jarvis打趣有網民留言，不習慣他「離開」日本，他回應：「其實我之前都成日去馬來西亞出trip，嗰邊嘅人好熱情，我都好鍾意馬來西亞。其實封關嘅時候，我都有同自己講過，開關一定要去世界唔同地方，世界咁大，唔周圍去好嘥㗎嘛。」他預告復常後自己與旅行社合作會繼續及頻密，且預告下月便會再出發到日本「尋寶」。