啦啦隊女神傳不和！Yuri美國之旅喪晒靚相　唯獨冇林襄

台灣中華職棒樂天啦啦隊「樂天女孩」，繼早前受邀嚟香港出席活動後，就急急腳去咗美國出席比賽應援活動，人氣高企。而昨日（27日）啦啦隊女神Yuri（陳怡叡）更喺社交網晒出一眾啦啦隊女神們出遊嘅性感靚相，場面哄動又吸睛。不過仔細一睇，眾多啦啦隊女神中竟然少咗靈魂人物林襄，搞到林襄BB委屈留言：「我覺得我被排擠！」

原來Yuri喺社交網晒靚相嘅同時仲感性寫道：「開心的是跟誰在一起，就算日夜顛倒、天涯海角，感謝我的美少女寶寶們賜予我這麼多美照，怎麼大家都這麼會拍照？」而照片中唯獨少咗嘅林襄，亦係照片下方連環留言：「此篇沒有我！」、「我覺得我被排擠！」、「你不是幫我拍了很多奇迹美照嗎？」最後仲難過到寫下：「太過分啦！」好彩最後事隔無耐Yuri就晒出勁多林襄嘅街拍靚相，並表示：「為了彌補上篇沒有小襄讓她覺得失溫，此篇滿滿的小襄！是不是非常生動！」