星玄︱李佳芯吊帶裙晒仙氣 認渴望被愛嚇怕對象

2023年05月29日 00:00
東網電視
更多新聞短片
全新一輯《星語》、《玄機》嚟啦!一集有齊每日星座同生肖運程,啱晒有唔同需要嘅大家,節目最後仲有精心挑選嘅各種問題,無論係地理、動物常識抑或外語題,你諗到嘅都有齊!有得輕鬆學嘢,而且不定時有唔同靚女擔任星天使講解星座運程,今集就有「嫩版李珊珊」之稱嘅邱晴(Mandy)登場!曾經參選港姐嘅佢笑得勁甜,加埋索爆嘅身材簡直無敵,記住每日睇《星玄》千祈唔好錯過啦!
講番正題,今日係5月29日,農曆四月十一。是日最旺生肖係狗,你哋桃花好旺,只要勇於表現自己,就好易搵到有緣人。李佳芯(Ali)就係屬狗,佢早排着住白色吊帶裙騷香肩,成個仙女咁完全唔似40歲!佢一向桃花唔弱,自從同陳炳銓分手之後,都有傳出唔少緋聞,例如畀蟲草大王力追,又有猛男陪旅行。雖然Ali全部否認,但其實佢講過好渴望被照顧被愛,不過自己又表現得好獨立,仲覺得係呢個原因嚇怕啲男仔添!所以Ali真係要聽話,今日開始勇敢表達真正諗法,表現渴望被愛嘅一面啦,肯定好快聽到你好消息!
至於今日幸運星係射手座,射手座嘅朋友獲幸運之神眷顧,事業發展可望突飛猛進!衛詩雅係射手座,好鍾意睇驚慄片嘅佢,最近喺新片終於可以自己演埋一份,可以將興趣結合工作,一定好開心,分分鐘憑新戲獲提名,令事業更上一層樓呀!