再度接拍港產片　何珮瑜晒蜜桃靚股慶祝

已移居內地的何珮瑜（Jeana）近日「突擊香港」，低調回歸1星期探親及與經理人公司開會。她突然於社交平台晒出三點式泳衣照，只見身材弗爆之餘更毫不吝嗇大晒「蜜桃靚股」，加上皮膚白滑，相當誘人，連蔡卓妍、連詩雅及林德信亦爭住派Like！

談到hot爆泳衣照，Jeana開心表示：「我自己都好鍾意呢輯相，大家都讚我好似返番去20歲出道嘅時候。（點Keep？）我好鍾意自己煮嘢食，冇咁多油，同埋我近日秘密練兵，試過練嘢練到受傷，敷吓冰又再繼續。因為好想保持最佳狀態，所以有目標堅持落去。」

她又預告稍後將會接拍港產片：「都好耐冇喺香港拍電影，嚟緊有機會喇。依家開咗關好方便，我好開心。（弗到咁，拍緊拖？）有人追，不過冇時間，嚟緊1個月我都要帶貨直播，邊會得閒諗其他嘢？」