周星馳忽然做「慈父」　自爆5歲參加開學禮瀨屎

「星爺」周星馳係喜劇鬼才，諗頭多多嘅佢依家愛玩社交網，趁住今日係六一國際兒童節，佢亦有出Post慶祝，仲分享咗兩張電影《長江7號》嘅極罕幕後花絮，只見佢一時同小女孩開心對望，一時又捏住小男孩面珠仔，盡顯慈父模樣，畫面幾咁溫馨。不過同時，佢就搞咗個「一人說一件最不堪的童年尷尬事」仲話最多Like嘅10位網友，會收到兒童節神秘禮物，而佢都好識拋磚引玉，自爆自己5歲時，出席幼兒園開學典禮竟然瀨屎，即刻令網友笑爆嘴。