黃智雯太命苦壓力爆煲 慘變「生人勿近」

2023年06月01日 19:02
東網電視
更多新聞短片
藝人黃智雯在無綫新劇《隱門》中的角色非常命苦,智雯經常要一臉苦情樣,不過網民就相當受落,搞笑地大讚她多了分成熟美兼愈嚟愈靚,又指角色富新鮮感。談到角色要同時面對衰老竇、衰老公及衰奶奶連環逼迫,她坦言壓力爆煲,並指自己慘變「生人勿近」:「呢個角色一直唔可以坦率面對身邊人,身心靈又受到好大壓抑同威脅,其實係好痛苦。自己拍嗰時都放鬆唔到條橡筋,啲幕後話拍嗰時唔敢行埋我度。」她又笑指遭吳岱融打出「真感情」:「拍衝突場口我哋大家都冇話特別留力,嗰種逼真感帶動到我反應更加真實,我覺得正嘅。」而為了準備角色,智雯專誠上了一個短期心理學課程,以了解在一個不健康家庭環境下成長的小朋友,對他們將來有何影響。
除了智雯,飾演其自私老公的黃子恆首集出場時已被鬧爆「衰到貼地」,對於再做「反派」,子恆謂雖然曾涉獵過多種角色,但這種衰老公角色卻是第一次:「唔好話觀眾想打呢個衰老公,我自己睇劇本都覺得呢個人唔抵幫,有啲對白真係幾自私,又孤寒。呢方面編劇係應記一功,好短時間之內用有限嘅對白同劇情,將個角色塑造出嚟。」她續指是次是繼《降魔的》後再與智雯合作,並笑謂上一次也是負責欺負對方。問他拍攝時有否心理負擔,他笑言最緊要觀眾睇得過癮:「我講對白都冇乜顧慮,因為都知呢個角色一定唔討好,但每套劇每個角色有唔同功能,既然方向係咁,我咪全心全意去做,最緊要觀眾睇完有反應。」至於劇中飾演惡家婆的盧宛茵,雖然角色惹人厭,但網民指她「只要戚起條眉,啲氣勢就係咁嚟」,獲讚入型入格。
有網民對黃智雯角色被虐打表示心痛:「見到你(黃智雯)畀佢打,就心痛」、「太可憐」、「鷲哥太喪,令人恐懼」,有網民更指劇集雖播得短短兩集,但已具追看性。觀眾看得肉緊,一面倒鬧吳岱融角色,不過黃智雯就在社交平台為「衰老竇」吳岱融「平反」,大讚對方戲外是風度翩翩的紳士,更期待跟吳岱融下次合作再續父女情演一對「溫馨父女」,她寫道:「今晚我同『賊王』阿爸終於『重聚』,亦係被虐打嘅序幕,嚟緊仲會愈嚟愈激。記得呢場箍頸戲,同阿爸開工冇耐就拍,雖然第一次合作,不過就好有默契。其實現實嘅岱融哥係好有風度,仲成日『萬歲』,好照顧台前幕後工作人員。 期望下次同岱融哥合作,可以演一對溫馨嘅父女。」
今晚(1日)一集中,她先被飾演老竇吳岱融掌摑及要脅要錢,之後又被衰老公黃子恆懷疑她跟陳展鵬出軌,要跟她離婚,連環打擊。至於吳岱融繼續癲喪本色,面對仇家尋仇,他以一敵四兼毫無懼色,連黃智雯的惡奶奶盧宛茵被他嚇到鼻哥無肉,當他向黃智雯勒索時揚言:「你老竇我死埋,你就冚家X。」未知是否對白太粗鄙,劇組要以「嘟」聲來為「冚家X」消音。