杜穎珊開設瑜伽中心　同男學生保持距離

藝人余曉彤（Hidy）與杜穎珊（Sandy）今日（1日）現身荔枝角出席運動頒獎禮。Hidy表示剛完成陳果執導的文藝電影，更笑指終於不用再做打女：「等咗6、7年，終於唔使再打，哈哈！始終年紀愈來愈大，想做專業演員，一直抱有運動精神，堅持咗好耐，上好多戲劇班學演技，好開心最近有唔同嘗試，可以發揮演技。（想挑戰邊類角色？）希望有機會演靚女、性感角色。（性感底線？）背全裸都可以接受嘅，睇劇情啦。」她亦透露下周將會為ViuTV鬼怪題材劇集開工。

至於Sandy則表示近年除兼任瑜伽導師，還開設了瑜伽中心，更笑言要一腳踢負責清潔雜務：「大學2年級已經考咗瑜伽牌，啱啱去完印尼深造，幾年冇放假，所以飛埋新加坡、台灣同內地度假。（有冇艷遇？）冇呀，我比較內向。」單身的她被問到有否男學生向她展開追求？她笑謂：「唔好啦，老師同學生應該保持適當距離好啲，除非個男仔超靚仔啦，哈哈！」她笑指樣貌不是擇偶重點，最重要是孝順、有愛心和與她共同進步。