盧慧敏瞓身轉型影視界　剪短秀髮令人眼前一亮

身為MIRROR成員Ian Chan舊愛的模特兒盧慧敏（Amy），向來長髮飄飄，近日為了工作竟剪淨八吋長！昨天她出席品牌私人派對並首次以清爽短髮登場，現場不少嘉賓對她的新髮型讚不絕口。Amy說短髮容易打理，尤其拍完通宵戲，洗髮時間也少用一倍：「未試過咁短頭髮，因為以前出到嚟都係好女仔、好靚咁，今次為咗一個工作而剪短咗頭髮，我估計都有八吋，一生人都未試過咁短頭髮，哈哈。其實剪嘅時候係冇感覺嘅，就好似換衫咁，不過呢件衫要着得耐啲，但到返到屋企洗頭、吹頭嘅時候，先覺得嘩！剪到好短喎！」

近年Amy參演多部影視作品，包括與影帝周潤發合演《別叫我賭神》，以及跟鄭丹瑞主演的《狗轉人生》等。由模特界擴展到影視發展，Amy說感覺幸運，也希望可再加快腳步：「我覺得有機會係好彩嘅，畢竟我嘅身高對拍戲係有所阻礙，呢樣嘢係天生，冇得改變。不過唔緊要嘅，我會加倍努力，依家有拍攝機會時，會一邊拍一邊向啲前輩偷師學習，同時都有上戲劇班，希望將來用實力話畀大家知我真係轉型成功！」