Jeremy劇透個人騷有新歌 笑指未有兄弟自薦做嘉賓

2023年06月02日 15:42
東網電視
更多新聞短片
人氣男團MIRROR成員李駿傑(Jeremy)今日(2日)現身尖沙咀,為將於8月30舉行的個人騷舉行記者會,吸引近百粉絲手持鮮花及各式應援物到場支持,大會亦有安排粉絲進入會場與偶像合照,會上亦公布了Jeremy為音樂會拍攝的兩款造型海報,他亦表示會於騷前推出新歌。首次舉行個人騷的他表示期待已久:「等咗好耐,歌單、流程已經度好晒。(會唱新歌?)會有新歌、我鍾意唱嘅歌,同埋大家估唔到我會唱嘅歌。」他笑言想保持神秘,故不能劇透太多。
12子早前忙拍電影《12怪盜》,Jeremy表示電影剛順利煞科,因此除了拍攝MIRROR的綜藝節目外,其餘時間可開始專心為個唱準備:「會有好多跳唱環節,舞蹈方面除咗有一貫風格,亦都想多啲Man啲、似MIRROR多啲嘅有型啲嘅。(騷肌?)都努力緊嘅,希望點都有少少。(練咗幾多嚿腹肌?)0嚿,哈哈!所以腹肌冇乜機會啦,可能騷手臂,睇吓到時進度啦。」
他指以往開騷有其他11位隊友同場,坦言今次一個人有點「驚驚哋」:「之前佢哋做緊嘅時候我有時間唞下,但今次係自己唱晒成個歌單真係要練氣,依家有努力跑步。(有冇搵人請教?)有問過吳林峰,佢話最緊要識得分配力量,邊啲位慳力邊啲位用力,如果唔係你全場不停爆去到尾會好攰。」問到會否邀請嘉賓或隊友上台助陣,他表示暫時未定,笑指未有兄弟向他敲門要求擔任嘉賓。
他坦言自己從未想過這麼快會有個人騷:「認真嘅,真係冇諗住咁快開,正如我話花姐Send message畀我嗰陣,我都以為佢Send錯,佢同我講嗰陣係今年年頭,我只出咗三首歌,點開個人音樂會?但如果有咁嘅機會,點解唔把握,畀大家睇到我係值得有呢個機會。(因為有呢個騷,所以公司唔安排你開個人演唱會?)唔知,呢個係公司安排,我都冇認真問,當我知道有騷我已經好開心,有冇都好,我都未覺得自己今年一定要有嘅,始終其他兄弟Solo咗2、3年,佢哋多我好多歌又多我好多經驗,畀我開騷係更加着數同容易,我可以去支持已經好開心,今日有自己音樂會真係真係一個Bonus。(唔怕等?)唔怕,最緊要係堅持,堅持就要等。」