被炒後今日將現身 林作死撐有文化差異:會捲土重來

2023年06月05日 08:53
東網電視
更多新聞短片
被稱「香港抽水王」嘅前大律師林作,尋日(4日)因以荷里活廣場謀殺案涉案疑兇造型兜售標明「逃跑一流」嘅同款二手波鞋,而引火自焚,遭任職嘅保險公司炒魷,連前度麥明詩及現任女友裕美都幫理不幫親。尋日佢就去咗球場踢波散心,稍後再現身有「貓貓校監」之稱網紅(KOL)嘅呂校長網上節目,又宣布今日(5日)舉行記招,以第一身交代最新進展。
而佢喺呂校長節目中,先被呂校長質疑冇同理心、同情心等,林作指自己冇帶頭引發各類事件爭議,自己通常都只係代人發聲,而佢嘅發言都係喺無傷大雅、並不是大是大非嘅嘢上面。自己絕對有同理心、同情心,佢唔會公開去表示自己嘅傷心、對亡者留言「RIP」等,係虛偽行為。今次被炒事件,技術層面上佢並唔係被炒,而係公司唔再同自己合作,自己亦冇嬲。
對於今次嘅波鞋抽水事件,佢Del post係受「高人指點」,呢個做法唔係龜縮,反而會引起大眾關注。而佢今次係同香港大部份人有文化差異,自己熱衷「Black humour(黑色幽默)」,只係依家香港文化上大家接受唔到,冇意冒犯任何人。
佢續稱未必唔再做保險,唔怕冇客,加上佢自己瓣數多,亦有做從商培訓導師等,有好多機遇,更會考慮做棟篤笑。最後佢就叫大家拭目以待,會捲土重來,亦多謝大家咁留意佢,做佢米飯班主。