張繼聰拍片擘大喉嚨廁所唱K　網民踢爆為老婆產品宣傳？

藝人張繼聰喺社交網以「《浴室有聲音》呈獻：懷緬過去常陶醉一半樂事之夜」為題上載短片，佢留言：「Y2K麻甩仔必唱吖，好想去K房，瘋狂插歌，起勢叫凍檸茶，青春呀！喺個廁所擘大喉嚨唱歌其實有少少老尬，隨時Delete post，有得睇嗱嗱聲睇多幾次。」

佢仲話其實起勢咁唱好爽，而影片嘅背景Filter係向當年嘅貼紙相致敬。從短片所見，阿聰拎住支噴霧嘅物體扮咪登場，之後就隨住背景音樂，唱出許志安當年嘅一首經典K歌《一家一減你》，仲唱得鬼咁肉緊，真係勁有K房味道。網友就留言大讚佢唱得好，仲要求佢下次開騷要照樣咁唱添。不過有網民就留意到佢並唔係求其嗱支嘢扮咪喎，睇真啲原來佢拎住嘅係太太謝安琪自家出品嘅產品，網友留言：「除咗高效保濕之餘，睇片就知道功能實用性可高了」、「值入廣告好給力」、「唔買支用都唔得」、「好襟撈呀吓」。