李靚蕾稱贏官司想尖叫　王力宏反斥：自我感覺勝訴

台灣天王王力宏和李靚蕾於2021年爆婚變，二人就離婚及撫養權等問題告上法院，官司喺台灣及美國兩地開戰，早前李靚蕾方就透過律師指二人喺美國法院嘅訴訟案中，王力宏已確定敗訴終結。本以為二人罵戰已經平息，各有各生活，今日（7日）佢就宣布開設錄音頻道《沉靚時間》，親揭自己如何走出婚姻嘅人生低潮，並再次提得知美國官司勝訴嘅喜悅。

當中佢談到呢1年嚟，對面美國同台灣官司同時進行，日頭除開工及學習課程，又要準備打官司嘅資料，為嘅就係半夜4點透過網路開庭，佢回首嗰段時間好難捱：「都沒辦法睡覺，那一天早上收到一封信，說我在美國的官司勝訴，我其實情緒很激動，需要大哭、尖叫一場，那時候我的靈魂已經出竅到廁所，很需要放聲大哭，就是很需要空間釋放我情緒。」

佢等到忙完公事同家事之後，直到晚上8點先有獨自一人嘅空間，佢去到客廳想要好好大哭一場：「結果，哭不出來，因為那個情緒已經過了」佢續強調分享呢啲經驗並唔係教大家忽略情緒，或假裝呢啲情緒唔存在，但要學會同情緒共存，每天以正常生活為主軸，真係難過嘅時候，就花幾十分鐘或一個小時抒發情緒，而唔係花好幾天陷喺情緒入面。

對於李靚蕾Channel發放嘅訊息，王力宏委任葉偉立律師回應如下：「法律講的是事實，不是感覺。針對李小姐podcast說美國勝訴。之前王力宏先生已經透過律師說明過是因為管轄權的原因移回台灣審理，沒有所謂『勝訴確定』事宜。對於李小姐自我感覺勝訴，我方無從評論。希望李小姐可以遵守台灣法院裁定並如實履行即可。」