ANSONBEAN新牌仔出事　單手扭軚險撞車

藝人ANSONBEAN昨晚（9日）現身藝術展覽，他坦言很久未有欣賞展覽，認為觀看藝術品令心靈上有所得着，並表示小時候也學過畫畫：「家人想我學多啲嘢，最初係學水彩畫，之後學素描，我會將自己鍾意嘅角色畫出嚟，畫得最多係蝙蝠俠。（好鍾意超級英雄？）都係，經常會畫超級英雄同怪獸呢類天馬行空嘅嘢，拍戲都好想演呢啲角色，因為覺得好玩又有動作場口，最鍾意蜘蛛俠同蝙蝠俠，可以鋤強扶弱，最想演蜘蛛俠。（要你演小丑或者怪獸肯唔肯？）都可以，只要係天馬行空就得，做演員都係想體驗其他人生。」

講到工作，ANSONBEAN透露正拍攝一部電影，但詳情要保密，不過就有不少新嘗試：「我幾個月前考咗車牌，可以喺套戲度用得上，不過拍攝期就差啲撞車，好在冇事，因為我要單手揸車，但我掛住望攝影鏡頭演戲，所以差啲唔記得煞車，撞到前面架車。（有冇嚇到大家雞飛狗走？）冇，佢哋唔知道。」另外，全民造星出身的他指也有留意《全民造星V》，並看好Taco，大讚對方的饒舌技巧很厲害。