Tiger首次執導　主角Lokman大讚︰人仔細細Lead到所有人

MIRROR成員邱傲然（Tiger）首次執導拍攝的短片《是日精選》，找來楊樂文（Lokman）飾演男主角，Tiger體驗了擔任導演一職的苦與樂，但他坦言愈自喜愛這個工作，談到今次製作，他表示：「玩大咗！」事關影片集合飛車打鬥場面，對初哥來說，難度極高，他說：「拍攝順利，拍完之後睇片再抽身諗，就會覺得有啲貪心，可能少啲、精啲可能會再好啲，但冇辦法，第一次就好興奮，想將鍾意嘅嘢擺晒落去。」

首次執導的Tiger跟到足，度橋、拍片、打燈、剪片、配樂、調色等全都參與其中，遇到不同崗位的電影工作者，他有感而發道：「呢個行業每一個識位都環環相扣，缺少一個部分，條片就會爭啲嘢。每個人都有Input，會令條片更加豐富。」在看過成品後，Tiger十分滿意說：「成個製作過程我都好開心同享受，因為團隊中個個都好有火，成班前輩唔係返工，真係想做好件事，成個過程可以回憶一輩子。」

經過這次實戰，Tiger自言拍上癮，很期待能有下一次拍攝機會，他透露已在籌備下一個Project，他說：「會睇多啲戲、報讀課程，又或者拍戲時遇到唔同導演，會多啲坐喺Mon隔離睇佢哋點樣拍戲，有乜又問下大家。」他決意多角度增值自己，全因今次的經驗令他對執導的熱誠愈來愈大，他說：「拍完呢條片，發現自己都幾鍾意呢件事，真係好玩！雖然係好大壓力好緊張，但過程真係好Enjoy！」

他可想過幫MIRROR兄弟拍MV？Tiger笑說：「要佢哋搵，唔係我話拍就拍，同埋MV、劇情片係兩個出發點，MV要好商業化，劇情片就未必須要，所以成個方式同System都好唔同，但我好期待有兄弟搵我，我會瞓身去做！」

身為短片中男主角Lokman，大讚好兄弟道：「老虎好清楚自己想要啲乜嘢，又以真誠相待所有工作人員，例如燈光師做完個燈畀佢睇，會大家一齊研究，然後可能推介少少做法畀佢，唔啱佢心水又會直接講，所以大家同佢夾得好舒服，呢個係佢做導演嘅一個優點，好有自己嘅想法，係佢犀利嘅地方。人仔細細，可以Lead到現場所有人。」Lokman經過今次演出，他發現自己有個死穴說：「打交係弱點，唔係好敢打人，仲未突破到。（有陰影？）唔知呀，我真係好怕打親人。」除了打人，他還要飛車，在短短4日的拍攝他一次過做勻，他都覺得「賺晒」，在演戲方面他想嘗試演女人，他說：「演其他角色都係男仔，演一個女仔完全係第二樣嘢，可以試下例如《翠絲》裏面姜皓文演嘅跨性別人士，又或者係同志角色，都想一試。」

除了Lokman，隊友Jeremy、江𤒹生（AK）及Frankie都有參與演出，他們在片中飾演劫匪，Jeremy為配合角色更破格演鈯，在片中粗口橫飛，Tiger特別多謝Jeremy道：「好多謝佢傾力瞓身演出，我都好surprise，佢講得真係好好，佢真係有練過，好純熟，好有嗰陣味道，好開心佢有呢個突破，希望佢多啲呢方面嘅突破，我相信大家都會好鍾意睇。」