愛駒終於贏！郭富城嗌破喉嚨　肉緊攬方媛振臂高呼

天王郭富城（城城）今晚（14日）與太太方媛到馬場支持愛駒「舞林密碼」出賽，城城喺場邊睇到相當肉緊，嗌破喉嚨，睇住愛駒首先衝線一刻，High到振臂高呼，之後仲攬住太太，面露喜悅表情，呢次愛駒首次跑第一，為城城贏得108萬3千元的頭馬獎金，仲額外獲得馬主自購馬首次勝出第三賽事嘅100萬嘅特別獎金，即合共贏得208萬3千元獎金。城城終於可以同方媛一齊影頭馬相啦，表現風騷嘅佢，不時同人揮手打招呼，仲開心到晒V添！