徐若瑄自揭瘡疤曾被性騷擾　懶理網絡霸凌一律封鎖

台灣女星徐若瑄早前出席公益活動為家暴受害婦孺發聲，並喺活動上分享身邊友人嘅悲慘遭遇：「已經是青少年了，還被爸爸像野狗般地踹打，媽媽去阻止後，也被飛踢到牆壁，不敢相信！」人美心善嘅佢，更現場宣布每月定期捐款幫助受害家庭。

徐若瑄表示對任何暴力零容忍，即使係言語暴力都會帶嚟難以磨滅嘅創傷，至於網絡霸凌，徐若瑄亦有獨特見解道：「一定會有人不喜歡你，但還是得去慢慢調適，我現在看到攻擊就直接封鎖！」認為人生應該用更多時間專注係你愛嘅人事物上，竟然都唔鍾意對方點解又要特別去指摘，所以對於網友嘅「指罵」徐若瑄都一律封鎖處理，落得耳根清淨。

另外，徐若瑄亦因應台灣「#MeToo」性騷擾一事，分享初出道時曾被男演員「假公濟私」抽水，表示當時同某位男星拍緊Kiss戲份，不過鏡頭明明就拍緊全景，男方竟然懶理繼續錫，如今諗番都仲嬲緊嘅徐若瑄更直言：「永生不必再見，如果再給我一次機會，我會直接賞他6巴掌！」