李霖恩父親節冇禮物　關伊彤望入圍《中年好聲音2》

藝人李霖恩策劃的新片《世上只有爸爸好》父親節舉行慈善優先場，霖恩與好友包括關伊彤及方紹聰等，現身支持。台上發言時，霖恩感性表示：「去年父親節，喺呢套電影首次播放，當時我爸爸（李少光）仲喺度，今年佢已離開，祝大家父親節快樂。」

受訪時，李霖恩指近日因為父親節，包場情況比較多，自己亦忙於協助宣傳。談到父親節慶祝活動，他「投訴」說：「頭先帶啲小朋友去親子樂園，佢哋玩得好開心，但我一張卡都冇收到。（暗示吓？）唔需要，咁兒童節佢哋都冇禮物收啫，哈哈！」談到《世》片反應好，會否再開拍類似片種，他坦言：「應該唔會嘞，不過我依家寫緊個劇本，係驚慄劇集嚟嘅，最快9、10月會開工。」

關伊彤則表示首映前已與丈夫及子女飲茶慶祝。至於《中年好聲音2》海選入圍問題，她說：「仲未收到通知，不過好似話宣傳片已經見到我，希望有機會啦。」她又指接下來會拍劇，提到入圍的話，會否有合約抵觸，她說：「咁我又冇考慮過，不過都劇拍咗先啫，都未知買畀邊間電視台，同埋嚟緊9月我會去馬來西亞登台，好耐冇試過出埠做嘢嘞。」