環球高層離職　石山街疑暗寸舊老闆

環球唱片去年傳出大地震，繼兩大唱將陳慧嫻、Gin Lee先後離巢，新世代歌手陳凱詠（Jace）盛傳因同公司鬧意見，而被掟入「雪櫃」，直至上月底正式約滿才得以走人。大中華區董事總經理黃劍濤（Duncan）上星期正式離任，離開掌管了16年的環球唱片，環球官網也有分享同事們與Duncan歡送的影片，並寫道「Miss u Goodbye」，不過有指旗下組合石山街於同日推出新歌《Way Out》（出路意思），在討論區引起熱議，認為夾都冇咁啱，似有「贈興」之嫌，其主音楊彤更加疑似在網上出Post暗寸舊老闆。

網友指石山街的新歌《Way Out》，歌詞中有「再見半秒面亦嫌多」、「拆開面具後 再不便敍舊」等，都似在講舊老闆離任一事，而主音楊彤又咁橋在個人社交網出Post為歌曲宣傳，除咗自嘲「唔紅有原因」，又寫「啲舊同事唔知係咪被我哋首歌Inspire到，啱啱個月己經走咗6 、7個（好似）」，有網民留言：「係咪專登？」似乎覺得她有弦外之音。