周星馳招募新片女演員　前中國女足長腿美女門神自薦

「星爺」周星馳早前趁住61歲生日，宣布相隔4年「復出」拍《少林女足》，仲透露新片會打入國際，公開招募唔同國籍又年輕貌美嘅女士去參與海選，並開出入圍條件：「今天我只有一個願望，就是能與 一大群不同國籍、年輕貌美、身材標致、天資聰敏、體能出眾的靚女，一起共渡難忘時光，人數不拘。」仲講到明絕對唔要P圖造假，即時引起網民熱烈討論。

今日（24日）身高有1米88、已退役嘅前中國女足長腿美女門神趙麗娜於社交網拍片自薦，佢表示自己體能出眾，會第一個報名參加海選：「星爺，你看我能不能有機會爭取一下這個角色，女足的電影，我必需要去爭取。」睇嚟佢真係好有信心喎，唔知星爺又會唔會揀佢呢？