白只難敵7年之癢宣布分手:仲係好朋友!
2023年06月25日 17:04
東網電視
更多新聞短片
![](/hk/bkn/cnt/entertainment/20230625/photo/bkn-20230625170438015-0625_00862_001_01p.jpg?20230625201428)
43歲藝人白只同細14年嘅顏卓靈(Cherry)於2015年合作拍戲,而擦出愛火,雖然外界一直唔睇好佢哋,仲話佢哋係「美女與野獸」嘅組合,不過白只曾表示會認真對呢段感情:「我諗住一生一世!」可惜最終難敵7年之癢,正式宣布分手!近日Cherry出席好友婚禮時,搶到人生第一個花球,但佢竟然話:「話說這是我人生第一次搶到花球~我想要幸福,但我不知道搶到要在限定時間內結婚⋯⋯!可以先告訴我對象在哪嗎?」佢透露自己已回復單身,仲搞笑話會考慮參加Speed Dating,睇嚟佢已Ready好投入新一段感情!其實早喺上年已傳出佢哋分手嘅消息,有指佢哋係因各種分歧而導致關係崩潰。
白只今日(25日)電影首映時,坦誠佢哋已分開一段時間,問到分手原因?佢話:「我冇乜可以講。(關唔關第三者事?)冇乜可以講。(大家仲係咪朋友?)都可以話係朋友,仲係好朋友。(有冇機會復合?)跑吓步先。(會唔會覺得可惜?)冇乜好講。(心情平復未?)都一段時,所以大家都OK。」
另外,佢透露喺戲中唔需要跑步,但同片對手周潤發仍要求佢每日開工前跑步,拍完電影後,佢與對方跑了3個月:「第一日我差啲跑到休克,不過佢係好教練,會睇住我心跳,因為佢知我又肥又論盡,冇做開運動,跟佢跑步係福氣。」周潤發聞言:「因為跑死咗個演員唔連戲,所以要睇住佢。」白只稱跑步期間瘦了10多磅,但停跑後已打回原形。