糖妹為AI獻聲採樣錄足8個鐘　孖林曉峰9月開騷

藝人糖妹今日（27日）以大使身份出席人工智能註冊特教導師培訓計劃，她指日常生活上有接觸AI（人工智能），近期更有做跟AI相關的工作：「要將我把聲採樣，都係幾崩潰嘅一件事，用我花8個鐘錄咗1千句粵語做採樣，原來想成就自己嘅AI唔容易，網上AI唱歌取你聲音語氣同個樣係OK，但如果你要做到係真人同你講嘢，要有感情，原來要錄咁多句，係幾特別經驗，我有做配音、主持，但未試過咁長時間喺studio硬食1000句，原來喺呢個時代依家需要付出人力，唔係咁簡單。」工作方面，糖妹透露會香港內地兩邊走，9月與林曉峰在內地有音樂會，問到何時在港開騷？她坦言：「未會，因為今年未派夠歌，我剛適應來回兩邊走工作模式，所以出歌係慢咗。」