超級Fans收藏過千盒《鐵達尼號》錄影帶：目標係百萬盒

由奧斯卡金像導演占士金馬倫（James Cameron）執導嘅經典之作《鐵達尼號》（Titanic）上映至今已踏入26年，喺呢廿六年間《鐵》翻做翻做再翻做，去年重映仍大把人買飛入場，有觀眾第1次睇亦有好多觀眾睇過好多次，不過更瘋狂都唔及呢位仁兄咁，佢喺家中收藏超過1,500盒《鐵達尼號》嘅錄影帶（VHS），名副其實係「鐵」粉！

一名來自佛羅里達州嘅錄影帶剪接師JD，佢6歲時喺戲院睇完《鐵》之後就愛得不能自拔，11年前開始就決定收藏《鐵》嘅錄影帶，佢除咗收藏美國版之外，連海外版嘅VHS都唔放過一一收藏，JD目前嘅「藏帶量」已接近1,600盒堆積如山！而佢更專登喺社交網開專頁將佢收藏VHS嘅過程全公開。

雖然已收藏咗咁多盒，但JD仍然唔夠喉下個目標係要收藏夠1,997盒，亦即係影片上映嘅年份。而佢更大想頭指自己希望收藏夠至少過百萬盒！