《造星V》Kakit同「AI尹光」Chill爆廟街

《全民造星V》十強塵埃落定，之前已出局的年僅19歲的鄧家杰（Kakit）被視為滄海遺珠，他的折骨舞吸睛，一身肌肉同樣殺食，難怪率先跑出，被譚仔雲南米線睇中，獲邀明日聯同hit爆的「AI尹光」出席活動。

在網上專頁的全民投票中，Kakit更成為「觀眾投票20強民意排名」中得到第三名，他亦開心轉發並留言說：「Thank you all！開心過真係攞第三！」

Kakit今日上載到廟街拍攝的跳舞短片，更以「廟街歌王」尹光的最新洗腦歌《掂呀》做背景音樂，Chill爆廟街！他更在貼文提到：「呢兩日面對海量式嘅安慰同鼓勵…我想同大家講聲…我！掂呀！」連尹光也有留言：「喂喂細路，就算條路有幾難行，都相信有奇迹！畀多啲信心自己、繼續努力！嚟緊星期三約你去譚仔，到時我同DJ正姐教你點撈，你就撈乜都掂呀！」