陳嘉倩背心出擊玩竹籃船　激凸上圍搶「峰」頭

前無綫新聞主播陳嘉倩，離巢後轉型做KOL，定時定候派軍糧就梗㗎喇，不過嘉倩BB叻在係「擠牙膏式」出Post，仲要每次都識得捉緊「重點」。

上個月去咗越南旅行嘅嘉倩BB，着小背心加熱褲，講句端午節快樂，輕輕露吓鎖骨，就吸咗4,000個Like。隔咗兩個星期有多，嘉倩BB先繼續Po越南系列，不過「軍糧」質素就大幅提升，先係着住超低圓領緊身背心，勇闖著名嘅美奈紅沙丘，擺個靚甫士玩沙，極罕有露出事業線，Like數挨近8,000，遠勝越南第一擊。

嘉倩BB今日更加發放「越南第三彈」，雖然收起咗事業線，但性感程度照樣爆燈，一件超貼身吊帶背心，加多個邪惡嘅斜孭袋，激凸上圍搶盡「峰」頭，嘉倩BB仲配埋條片，體驗當地嘅漁夫竹籃船，戴上竹籃帽嘅佢非常可愛，竹籃船仲好似「爆旋陀螺」咁瘋狂轉，相當過癮。

出甫冇耐就喪吸2,000Like嘅嘉倩BB，仲喺貼文寫到：「去會安梗係要感受吓越南嘅Sunshine，同漁夫竹籃船，Surprise嘅係船伕好錫住我哋，同埋好鍾意聽Gangnam Style，係精神嘅！」。除咗有網民留言回應「越南姑娘有冇你咁靚」之外，亦有網民大讚嘉倩BB識玩，掌握到流量密碼，每個越南Post都有唔同重點同感覺。唔知嘉倩BB嚟緊會唔會繼續「越南系列」又會有啲咩睇呢。