蔡思貝硬Sell做「星女郎」 瞓晒身泳照浴照都出齊
2023年07月15日 14:03
東網電視
更多新聞短片
![](/hk/bkn/cnt/entertainment/20230715/photo/bkn-20230715140328056-0715_00862_001_01p.jpg?20230715163900)
周星馳早前公開召募電影《少林女足》的年輕女演員,吸引數以百計女星自薦追「星」,為突圍而出,視后蔡思貝今日(15日)再出奇招Hard Sell,她於社交網上載了一段長1分鐘的自製片段,片中見她遊歷世界各地苦練足球,一時大騷球技,一時又倒吊做掌上壓,向星爺「巴黎鐵塔反轉再反轉」致敬,之後連坐住艇都要用心口頂波,夠晒無厘頭。最博係佢激罕出動水着Look,一件頭純白泳衣上陣玩淋浴,大玩濕身誘惑,仲瞓埋浴缸踢水騷長腿,施展「美人計」望得星爺青睞,佢留言表示:「Dear Stephen,日子感覺過得好快,由你生日,到現在已經三個禮拜了,可能遲來,但整個旅程每一刻我也是想着你的,我走了九個城市,拜候武林各界高手,修練自己,我,準備好了。」
說到她嘔心瀝血製作這條片,蔡思貝接受東網訪問時謂:「要大家好有耐性睇晒成條片,真係唔可以太長,我set咗1分鐘內要完成晒條片,啲網民先有耐性睇,係有啲難度嘅,但係要星爺睇到我,真係好想參與佢嘅製作,我真係好畀心機喺1分鐘入面表達到最多嘅嘢,睇到我最多嘅一面,畀佢睇到我嘅創作、創意。」思貝坦言整條片都是她一手一腳製作,由構思、剪片加音樂、字幕一腳踢,她謂:「之前星爺喺佢6月22日生日PO出招募,咁啱我就係嗰日飛英國拍節目,拍節目時間好緊密,我乜都做唔到,只好每一日諗盡方法,可能係攝影師轉機位嘅時候我就叫人幫我拎住部機拍一個Shot,之後再有空檔,可能大家食緊lunch嘅時候,我又拍少少。」思貝坦言拍節目不停要轉景點,自己已經靈魂出竅,回港時在機上自己就即剪片,不能浪貴任何時間:「返嚟香港我都冇瞓過,努力剪晒條片,我希望藉住呢條片話畀星爺知我係幾有誠意,我係幾appreciate佢。」